Minggu, 18 Maret 2012

PATURAY TINEUNG


                Assalamu’alaikum wr. wb.

            Puji sinareng sukur urang sanggakeun ka Gusti Nu Maha Suci, Allah SWT. Nu parantos maparin mangrebu-rebu kani’matan tarutamina ni’mat iman sareng ni’mat islam. Teu hilap oge shalawat sinareng salam mugia di kocorkeun ka junjunan urang sadaya Nabi Muhammad SAW. Alhamdulillah dina danget ieu urang sadaya tiasa riung mungpulung dina raraga nyakseni upacara paturay tineung.
            Bapa kalih Ibu, hadirin nu dipihormat.
            Sim kuring ngadeg di ieu tempat minangka wawakil ti rerencangan kelas tilu, hoyong cumarios ngedalkeun kereteg angen.
            Mungguh ari waktu asa nyeak pisan sajorelat, asa kamari sim kuring saparakanca munggaran lebet ka ieu sakola, ayeuna tos kedah paturay deui. Sim kuring saparakanca kedah miang deui neraskeun sakola, ngahontal harepan sareng cita-cita.
            Kantenan bae salami tilu taun diajar di ieu sakola, seueur pisan nu bakal janten panineung. Atuh kasaean Bapa kalih Ibu Guru sadayana, elmu pangaweruhna anu di dugikeun ka sim kuring saparakanca, tangtos bakal nyerep dina angen, janten obor nu nyaangan jalan sorageun. Kalayan diaping dididik ku Bapa Ibu Guru pisan, sim kuring saparakanca ngaduh elmu nu mangpaat. Dituduhkeun nu sae sareng nu awon, nu leres sareng nu lepat, nu poek sareng nu caang.
            Teu aya nu tiasa kapisanggem, iwal ti hatur nuhun kana pirang-pirang kasaean Bapa Ibu Guru sadayana. Sim kuring saparakanca teu tiasa males eta kasaean, anging ngedalkeun du’a, pamugi rupaning elmu nu parantos di paparinkeun, kenging ganjaran nu ageung mangtikel-tikel ti Gusti Nu Maha Suci. Amin.
            Atuh salami sim kuring saparakanca diajar di ieu sakola, kantenan bae seueur pisan kalepatan, seueur pisan sikep sareng paripolah nu sakapeung matak rungsing ngajengkelkeun. Jalaran kitu, ngawakilan rerencangan sadayana, dina danget ieu sim kuring nyuhunkeun dihapunteun tina samudaya kalepatan kaluluputan.
            Pamungkas, sim kuring saparakanca nyuhunkeun pidu’a ti Bapa kalih Ibu Guru sadayana, pamugi alumni nu lulus taun ieu tiasa neraskeun sakola. Lungsur-langsar teu aya halangan-harungan, nyukcruk elmu di tingkat nu langkung luhur.
            Rupina sakitu anu kapihatur, hapunteun bilih aya basa anu kirang merenah larapna, bilih aya kalimat anu teu raos kana manah.

            Kamari mawa ragaji.
            Ayeuna rek mawa kisa.
            Kamari urang ngahji.
            Ayeuna urang papisah.

Wabillahi taufik wal hidayah. Wassalamu’alaikum wr. wb.


Tidak ada komentar:

Posting Komentar